மீனுவின் மியாவும் ஜூ ஜூ வின்

பழுப்பு நிற கண்களோடு , பயிற்சிகள் ஏதுமின்றி மதில் மேல் நடக்கும் பூனைகளை கண்டால்
மீனு குட்டிக்கு எப்போதும் மிரட்சிதான்.
அதிலும்
இரவில் ஜன்னல் இடுக்கினுள் உடல் தளர்த்தி நுழையும் சாதுர்யம் பார்த்து
அலறி அழுவாள் !

சாப்பிட அடம் பொழுதுகளிலெல்லாம் மியாவ்
என்றால் மறுப்புகளின்றி
நம் வேலை எளிதாய் முடியும்
இதன் எதிர் மறையாய் ,
ஜூ ஜூ என்று சொன்ன மாத்திரத்தில் ,
எத்தனை அழுகையிலிருந்தும் மீண்டு
விடுவாள் மீனு பாப்பா!

ஈன்று பத்தே நாளான எதிர் வீடு நாய்குட்டிகள் மீது அவளுக்கு சொல்ல தெரியா பிரியம்.
நடவ பழகியிராத குட்டிகளை தூக்கும் போதெல்லாம் எங்கிருந்தோ வந்து விடுகிறது அவளுள் ஒரு தாயின் மாண்பு !
நழுவி இறங்கும் குட்டிகளை மீட்டெடுத்து தோளில் கிடத்தும் அழகில்,
உலகம் சில நொடி அப்படியே நின்றால் என்ன வென்று தோன்றும் !

அவள் உலகு அணு தினமும் மியாவும், ஜூ ஜுவும் இன்றி நகர்வதேயில்லை .

அலுவல் நிமித்தமாய் நகரின் அடுக்கு மாடி குடியிருப்புக்கு புலம் பெயர்ந்த பிறகு
இப்போதும் அவள் உலகில்
பூனை களும் ஜூ ஜூ களும் உலவி கொண்டு தான் இருக்கின்றன .

இன்னும் எத்தனை நாள் என்று தெரியாது
எதிர் வீட்டில் இருபவரின் முகம் அறியாமல்
வாழும் இங்கு ,
மீனு வை காண
பூனை களும் ஜூ ஜூ களும் வர வாய்ப்பில்லை என்று
அவள் தெரிந்து கொள்ள !